Gepleşik her hepdäniň Şenbe we Sişenbe günleri ýaýlyma goýberilýär. Adatça ol 50 minut töweregi dowam edip, birnäçe tapgyrlardan ybarat bolýar. Has dogrusy, siz bäsleşige tomaşa etmek bilen logika, matematika, fizika, himiýa, biologiýa, astronomiýa, informatika, geografiýa, edebiýat, kinomatografiýa we başga-da dürli ugurlar boýunça sowallara duş gelersiňiz.
Gepleşigiň alypbaryjysy Türkmen döwlet medeniýet institutynyň talyby Ýunus Allanazarowdyr, gepleşigiň redaktory we režissýory bolsa, Hojamyrat Alimyradowdyr.
Şeýle-de “Zehin bäsleşigi” atly gepleşik diňe bir hünärmenler bilen geçirilmän, eýsem telegörijileri hem özüne çekmegi başarýar.
Gepleşigiň her sanynda alypbaryjy bilen telegörijiniň arasynda ýygy baglanyşyk duýulýar. Has dogrusy, telegörijilere ýörite sowallar berilip, olaryň jogabyny bilip, 0535 gysga belgä ýa-da zehinbasleshigiofficial@gmail.com e-salgysyna jogap ýollanlar bolsa, ýörite sowgatlara mynasyp bolýarlar.
Şeýle hem bu bäsleşige tomaşaçylar tarapyndan gelip gowşan ýörite sowallar her tomaşaçynyň ady agzalmak bilen bäsdeşlere ýetirilýär. Bu bolsa gepleşigiň muşdaklarynyň barha köpelmegine esas bolýar.
Türkmenistanyň Kärdeşler Arkalaşygynyň milli merkezi tarapyndan bolsa bäsleşigiň ýeňijilerine we işjeň gatnaşýan telegörijilere sowgatlar yzygiderli gowşurylýar.
“Zehin bäsleşiginiň” bu möwsüminde bolsa, Garaşsyz Watanymyzyň 30 ýyllyk şanly senesi mynasybetli birnäçe üýtgeşmeler giriziler. Olaryň iň esasysy hem, gepleşigiň döredejilik topary bu möwsümde bäsleşigiň çäklerinde diňe bir her pudakdan gatnaşan hünärmenleriň içinden iň zehinlisini saýlaman, eýsem pudaklaryň ýeňijilerini hem özara bäsleşdirip, has zehinlilerden-zehinlisini ýüze çykarmagy maksat edinýär.
Mundan başga-da bu möwsümde sowallar, şertler we tapgyrlar bilen baglanyşykly birnäçe özgertmeler giriziler. Emma, siz olara bu makalany okamak arkaly däl-de, gepleşigi sypdyrman tomaşa etmek arkaly şaýat bolup bilersiňiz!
Şemşat Setdarowa,
Türkmenistanyň Kärdeşler arkalaşygyklarynyň Milli merkeziniň Maglumat seljeriş we halkara gatnaşyklary bölüminiň müdiri
Teswirler