Ösen bazar ykdysadyýetine geçmeklige ynamly gadam urýan Türkmenistan bu ugurda täze ösüşlere ýetýär. Gazanylýan ösüşlere saldamly goşant goşýan elektron söwda we internet dükanlar indi sanly Türkmenistanyň aýrylmaz bölegine öwrüldi. Şeýle internet dükanlaryň biri hem «100haryt.com»-dyr. Bu internet dükany 2016-njy ýyldan bäri paýtagtymyzyň ýaşaýjylaryna öz hyzmatlaryny hödürläp gelýär. «100haryt.com» internet dükany açylan wagty elektron enjamlaryny satmaga ýöriteleşendi. Soňlugy bilen müşderileriň bidirýän talaplary esasynda himiýa önümlerini, iýmit serişdelerini iň elýeterli bahadan satmaga başlady.
-«100haryt.com» internet dükanymyzy esaslandyran günümizden bäri paýtagtymyzyň ýaşaýjylarynyň islegini kanagatlandyrmak biziň esasy maksadymyz bolup durýar. Häzirki wagtda biziň internet dükanymyzda elektronika enjamlary, arassaçylyk serişdeleri, şahsy gözellik we ideg, çagalar üçin oýnawaçlar, iýmit önümleri we birnäçe bölümler bar. Biziň internet dükanymyz dünýä meşhur robototehnika kompaniýasy hasaplanýan «Arduino» kompaniýasynyň Türkmenistandaky ýeke-täk dilleri hasaplanýar. Internet dükanymyzda robototehnika höwesli ýaşlar üçin birnäçe enjamlar bar. Mundan başga-da dünýäde meşhur brendler hasaplanýan «Bosch», «Polaris», «Ikea», «Tefal», «Itimat», «Electrolux», «Korkmaz» ýaly firmalaryň önümleri biziň harytlarymyzyň esasy bölegini düzýär. Şwesiýanyň firmasy bolan Ikeanyň önümleri internet dükanymyzyň iň geçginli harytlary hasaplanýar-diýip, internet dükanyň esaslandyryjysy Ýazmyrat Baýramow gürrüň berýär.
Täzelikde Google Play we AppStore-de mobil enjamlar üçin niýetlenen ykjam programmany ýerleşdirdik. Täze döredilen applikasiýada üç dilde ýagny türkmen, rus, iňlis dillerinde harytlary halka hödürlemek, hepdelik aksiýalary geçirmek, dürli arzanladyşlar bilen müşderileri yzygiderli we wagtynda habardar edip durmaklyk göz öňünde tutulýar.
Müşderi söwdany dört tapgyrda amala aşyrýar. Sarp ediji satyn almak isleýän harydy hakynda sorag bilen web-sahypa ýüz tutýar. Soraglaryň jogaplary, ýagny harytlar toplanylýar we deňeşdirilýär. Ulanyjy satyn almak hakynda karara gelýär. Ahyrynda töleg tabşyrygy amala aşyrylýar we harytlaryň ýa-da hyzmatlaryň üpjünçiligi berjaý edilýär. Tölegler nagt we nagt däl görnüşde, müşderiniň islegine görä amala aşyrylýar. Mundan başga-da täze döredilen ykjam programmada eltip bermek hyzmaty boýunça üç salgy bermek, ýagny häzirki ýaşaýan ýeriň, işleýän ýeriň, garry öýüň ýaly görnüşde düzgünleşdirmek göz öňünde tutuldy. Bu bolsa müşderiniň sargyt eden harydyny öz islegine görä, islän wagtynda we islän ýerine eltip bermeklige mümkinçilik döredýär. Eltip bermek hyzmaty Aşgabat, Änew we Büzmeýin şäherlerine edilen sargytlaryň umumy bahasy 100 manatdan geçende mugt amala aşyrylýar. Şoňa görä-de, internet dükanlarda tapgyrlaryň ählisi üçin anyk we ýeterlik maglumatlaryň berilmegi üstünligiň açarydyr.
– Internet dükanymyz Aşgabat şäherinde hereket edýän beýleki onlaýn marketlere garanyňda süýt we süýt önümlerini eltip bermekde öňe saýlanýar. Munuň sebäbini ammardan çykan harytlaryň tä müşderiniň eline baryp gowuşýança sowadyjynyň içinde saklanylýandygy bilen düşündirip bileris. Mundan başga-da ammarda halkyň gündelik sarp edýän serişdeleri, iýmit önümleri bellenilen temperaturada we çyglylykda saklanýar. Biziň esasy maksadymyz halkyň islegini kanagatlandyrmak bolup durýar. Bu bolsa biziň internet dükanymyzyň şygaryndan hem düşnüklidir. «Tiz, ýeňil, amatly» şygary bilen işimizi döredijilikli utgaşdyrýarys, diýip, internet dükany esaslandyryjy belleýär.
Biz hem ýurdumyzda ilkinji açylan we halkyň söýgüsine mynasyp bolan «100haryt.com» internet dükanyna diňe üstünlik arzuw edýäris. Sebäbi, elektron söwdanyň ösüşi bölek söwdanyň janlanmagynyň, bäsdeşlige ukyplylygy ýokarlandyrmagyň we netijede, milli ykdysadyýeti ösdürmegiň hereketlendiriji güýjüdir.
Taýýarlan:
Sona HALYKOWA,
Türkmenistanyň Daşary işler ministrliginiň Halkara gatnaşyklary institutynyň talyby.
Teswirler