Birleşen Milletler Guramasynyň Baş Assambleýasynyň 73-nji sessiýasynda ähli agza döwletler tarapyndan kabul edilen, ýurdumyzyň öňe süren “2021-nji ýyl – Halkara parahatçylyk we ynanyşmak ýyly” atly Kararnamasyny durmuşa geçirmegiň çäklerinde üstümizdäki ýylda toplumlaýyn iri halkara-syýasy çäreleriň geçirlmegi meýilleşdirilýär.
Şunuň bilen baglylykda, 2021-nji ýylyň 29-njy martynda Türkmenistanyň Daşary işler ministrliginiň Halkara gatnaşyklary institutynda wideoaragatnaşyk arkaly “Parahatçylyk we Ynanyşmak” atly halkara ýaşlar forumy geçirildi. Bu möhüm çärä Türkmenistanyň Sport we Ýaşlar syýasaty ministri, BMG-niň Türkmenistandaky Hemişelik utgaşdyryjysy, BMG-niň kömekçi edaralarynyň, şol sanda BMG-niň Ilat gaznasynyň, BMG-niň Çagalar gaznasynyň, BMG-niň bilim, ylym we medeniýet meseleleri boýunça guramasynyň (UNESCO) we sebitleýin ýaşlar guramalarynyň wekilleri gatnaşdylar.
Forum, dünýäde parahatçylyk medeniýetini,ynanyşmagy, çydamlylygy berkitmeklik üçin ýaşlaryň gatnaşygyny üpjün edýän bitewi gurluşyň döredilmegine ýardam berýär.
Forumyň dowamynda halkara guramalaryň wekilleri milli, sebitleýin we dünýä derejesinde parahatçylyk medeniýetini berkitmekde ýaşlaryň gatnaşygyny giňeltmek boýunça maksatnamalary hödürlediler. Forumyň ahyrynda oňa gatnaşyjylar bilelikdäki ýüzlenmäni kabul etdiler.
Forumyň netijeleri 2021-nji ýylyň 7-8-nji aprelinde Nýu-Ýork şäherinde geçiriljek Ykdysady we Durmuş Geňeşiniň (ECOSOC) ýaşlar forumynyň işine öz goşandyny goşar.
Baýnazar Nepesow
Türkmenistanyň Daşary işler ministrliginiň
Halkara gatnaşyklary institutynyň
halkara gatnaşyklary fakultetiniň I ýyl talyby
Teswirler