Türkmenistanyň Prezidenti Gurbanguly Berdimuhamedowyň 2008-nji ýylyň 20-nji martynda çykaran Permany bilen Türkmenistanyň Daşary işler ministrliginiň Halkara gatnaşyklary instituty döredildi. Ýurdumyzyň diplomatik gullugy üçin zerur bolan halkara derejeli hünärmenleri taýýarlamak türkmen diplomatiýasynyň milli mekdebiniň öňünde goýlan esasy wezipe bolup durýar.
Hormatly Arkadagymyzyň 2009-njy ýylyň 29-njy dekabrynda Türkmenistanyň Daşary işler ministrliginiň Halkara gatnaşyklary institutynyň täze binalar toplumyny gurmak baradaky Karara gol çekmegi bilen Fransiýanyň “Buing Batiman Internasional” kompaniýasy tarapyndan ýokary okuw mekdebiniň gurluşygyna badalga berildi. 2011-nji ýylyň 1-nji sentýabrynda Türkmenistanyň Prezidenti hormatly Gurbanguly Berdimuhamedowyň gatnaşmagynda türkmen diplomatiýasynyň milli mekdebi dabaraly ýagdaýda açylyp ulanylmaga berildi.
Bu binalar toplumyna institutyň baş binasy, okuw binasy, talyplaryň umumy ýaşaýyş jaýy hem-de sport toplumy girýär. Baş binanyň günbatar tarapynda ýerleşen okuw binasy Halkara ykdysady gatnaşyklary we Halkara žurnalistikasy fakultetleriniň talyplary üçin niýetlenendir. Türkmenistanyň Daşary işler ministrliginiň Halkara gatnaşyklary institutynyň täze binalar toplumy paýtagtymyzyň merkeziniň binägärlik keşbine özboluşly görk goşýar. Ol hormatly Prezidentimiziň howandarlygynda türkmen diplomatiýasynyň milli mekdebiniň kemala gelýändiginiň ýene bir aýdyň subutnamasydyr.
Häzirki döwürde institutyň gurluşyna laýyklykda onda 4 sany fakultet we 6 sany kafedra hereket edýär. Ýokary okuw jaýynda Halkara gatnaşyklary we diplomatiýa, Halkara hukugy, Halkara ykdysady gatnaşyklary, Halkara žurnalistikasy boýunça ýokary bilimli hünärmenler taýýarlanylýar. Institutda giň möçberli halkara hyzmatdaşlygy hem alnyp barylýar. Onuň esasynda dünýä döwletleriniň dürli ýokary okuw jaýlary bilen diplomatik institutyň arasynda birnäçe Ähtnamalara, Maksatnamalara, ylalaşyklara gol çekildi. 2017-nji ýylyň 1-nji sentýabrynda institutda Durnukly Ösüş maksatlary boýunça ylmy-usulyýet merkezi açyldy.
Institutda talyplaryň okuwyny we sapakdan daşary işlerini, durmuşyny we dynç alşyny guramak üçin zerur şertleriň ählisi döredilendir. 2009-njy ýylda bolsa institut öz uçurymlaryny işe ýollap başlady. 2009-2020-nji ýyllar aralygynda uçurymlaryň 586-sy instituty tamamlap, şolaryň 88-si tapawutlanan diplomlara mynasyp boldular. Institutyň uçurymlary ýurdumyzyň Daşary işler ministrliginiň ulgamyna, hukuk goraýjy edaralaryna, Ykdysady we maliýe toplumyna şeýle hem ýurdumyzda hereket edýän gazet-žurnallaryň redaksiýalaryna we beýleki edara-kärhanalara işe ugradyldy. Olaryň birnäçesi ýurdumyzyň daşary ýurtlardaky ilçihanalarynda we konsullyk edaralarynda işleýärler.
Hatyja Döwletnazarowa
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby
Teswirler