2021-nji ýylyň ilkinji günlerini täze üstünliklere besleýän Daşoguzyň çeper halyçylyk kärhanasynyň ussat halyçylary geçen ýyly guwandyryjy görkezijiler, ýokary zähmet netijeleri bilen jemledi.
Bu ýerde haly we haly önümleriniň 3029 inedördül metrden gowragy dokalyp, ýyllyk meýilnama 106,4 göterim berjaý edildi. Şanly seneleri toý sowgady bilen garşy almagy asylly däbe öwren ussat halyçylaryň dokan haly we haly önümleri pul mukdarynda 4 million 870 müň manada barabar boldy. Bu bolsa çeper halyçylyk kärhanasynyň geçen ýylky netijeleriniň manat möçberindäki ösüşiniň 136,5 göterime deňdigini görkezýär.
Täze ýaşaýyş jaýlary, edara binalary üçin uly ölçegli halylara ýörite buýurmalar bilen ýüz tutýarlar. Täze gölleri, reňkleriniň sazlaşykly öwüşgini, dokalyşynyň ýokary hil derejesi hem-de ölçeginiň ululygy bilen aýratyn tapawutlanýan halylar şu ýyl hem köp sanly döwrebap ýaşaýyş jaýlaryna, iş otaglaryna görk berer, döwletli ojaklaryň törüni bezär.
Gülnabat Duşemowa,
Türkmen oba hojalyk institutynyň talyby.
Teswirler