Şu ýylyň 15-nji noýabrynda «Bizbärde» sosial ulgamy internet köpçüligine açylar. Bu ulgamda ulanyjylar öz arasynda tekst, surat we wideo habarçalary alyş çalyş edip, umumy lentada bildirişlerini paýlaşyp bilýär.
«Bizbärde» sosial ulgamy ýerli domen we hostingde ýerleşýär. Şol sebäpli ulanyjylaryň şahsy maglumatlarynyň konfidensiýallygy üpjün edilýär.
«Bizbärde» sosial ulgamy ilkinji gezek 2018-nji ýylda barlag maksatly ulanyşa açylypdy. Gysga wagtda bu ulgam arakesme berdi. Şol döwürde ulgamyň işleýşinde gazanylan tejribeler esasynda proýekt kämilleşdirildi we resurslar giňeldildi. Ähli taraplaýyn tehniki taýýarlyklaryny barlagdan geçirdi.
Bu proýekt «Türkmentelekom» elektrik aragatnaşyk kompaniýasynyň «Sungat eseri» hususy kärhanasy bilen hyzmatdaşlygynda amala aşyrylýar.
«Sungat eseri» hususy kärhanasynyň direktory Eziz Beknazarow: «Biziň kärhanamyzyň topary ýerli we milli sosial ulgamyň zerurdygyny nazara alyp, «Bizbärde» ulgamyny işläp taýýarlady. Hat-da biz munuň ilkinji synanşygyny 2018-nji ýylda amala aşyrdyk. Şol döwür tehniki ýetmezçilikleri hem-de ulanyjylardan gelen teklipleri hasaba aldyk we proýektiň göwrümini has-da giňeltmegi kararlaşdyrdyk. Bu proýekt biziň bilýän adaty sosial ulgamlardaky adaty funksiýalaryň köpsüni özünde jemleýär. «Bizbärde» sosial ulgamyň ýerli serwerlerde ýerleşdirilmegi onuň tizligini we maglumat howpsuzlygyny üpjün etmek bilen aýratyn häsiýete eýedir. Proýekt kämilleşmäge açyk ýagdaýda düzüldi,» diýip belläp geçdi.
Türkmenistanly internet ulanyjylaryň sanynyň artmagy, internet hyzmatlarynyň köpdürliligine ýetirýär. Häzirki wagtda Türkmenistanda e-banking, onlaýn dükanlar, ulag petekleri, wirtual sergiler, onlaýn okuwlar we başga-da hyzmatlardan peýdalanyp bolýar.
Teswirler