Türkmenistanyň demirgazygynda künji ýetişdi. Künji oragyna çenli işewürleriň onlarça wekili işjeň gatnaşýar we agrosenagat işini işjeň özleşdirýärler. Muňa mysal hökmünde Senagatçylar we telekeçiler birleşiginiň agzasy Nurgeldi Gurbanbaýewiň, şu ýyl Ruhubelent etrabynyň «Altyn Zaman» daýhan birleşiginiň çäginde dört tonna künji ösdürip ýetişdirendigini görkezmek bolar. Bu barada «Türkmenistan altyn asyr» elektron gazeti habar berýär.
Ol künji öndürmek bilen iki ýyl bäri meşgullanýar. Bu möwsümde oňa döwlet tarapyndan uzak möhletleýin peýdalanmaga bölünip berlen 50 gektaryň 10 gektar ýeri künji üçin bölünip berildi. Telekeçiniň aýtmagyna görä, toplanan tejribe geljekde bu gymmatly ýag ekininiň hasyllylygyny ep-esli ýokarlandyrmaga mümkinçilik berer.
Şeýle hem Ruhubelent hem-de S.Türkmenbaşy etraplarynyň ekin meýdanlarynda daşoguzly telekeçiler tarapyndan bol hasyl ýetişdirildi.
Ýurduň demirgazygynda künjini köp möçberlerde ýetişdirmek şu ýyl giň gerime eýe bolan bolsa-da, ony ösdürip-ýetişdirmegiň däpleri gadymy döwürlerden gözbaş alýar. Käbir ekerançylyk ýerlerinde juwazlar hem saklanyp galypdyr.Ýakymly ysly, tagamly we peýdaly ýag taýýarlanylypdyr.
Iň gadymy ýag ekininiň antioksidantlara, aminokislotalara, beloklara we A, B, C we E witaminlerine baýdygyny bellemek gerek. Künji tohumynyň düzüminde kalsiý, kaliý, magniý, demir, fosfor, fitin, riboflawin we tiamin bar. Sykylyp alnan tagamly ýag öndürmekden başga-da, künji konditer önümleri taýýarlananda hem we nahar bişirilende we halwa ýaly meşhur gündogar tagamlary taýýarlamakda peýdalanylýar.
Şöhrat Aýmämmedow,
S.A.Nyýazow adyndaky TOHU-nyň mugallymy.
Teswirler