Oktýabryň başynda Kazanda guşakly göreş boýunça dünýä çempionatynyň final tutluşyklary geçirildi. Bu barada Russiýanyň göreş federasiýasynyň metbugat gullugyna habar berýär.
Ýaryşda dünýäniň 26 döwletinden bolan 130-dan gowrak türgen agram derejeleriniň onusynda özaralarynda bäsleşdiler. Garaşylyşy ýaly umumytoparlaýyn hasapda, ähli agram derejelerinde birinji orny eýelän Russiýanyň ýygyndysy ýeňiş gazandy.
Türkmenistanly türgenleriň arasynda Nowruz Kakalyýew şowly çykyş etdi. Ol 75 kg agram derejesinde kümüş medala mynasyp boldy.
Türkmenistanyň ýygyndy toparyndan Emirhan Esenow (65 kg), Serdar Sapargeldiýew (70 kg), Mekan Serdarow (100 kg) we Begli Hudaýnazarow (130+ kg) dagy bolsa çempionatyň bürünç medalyny eýelemegi başardylar.
Saýlama tutluşyklar 1-nji oktýabrda Moskwada geçirildi, deslapky tutluşyklar bolsa 2-3 oktýabrda Kazanyň Powolžýe sport akademiýasynyň binýadyndaky Sportuň küreklemek görnüşleri merkeziniň köpugurly sport toplumynda geçirildi. Final duşuşyklary 3-nji oktýabrda «Kazan-ring» awtodromynyň ýöriteleşdirilen meýdançasynda boldy.
Sportuň bu görnüşi X asyrda ýüze çykyp, türki halklaryň arasynda uly meşhurlyga eýe bolýar. Final duşuşyklarynyň açyk meýdançada geçirilmegi bolsa milli baýramçylyklarda sport ýaryşlaryny açyk howada gurnamak däbine eýerilmegi bilen baglanyşyklydyr.
Teswirler