Milleti boýunça türkmen bolan «Zenitiň» eýranly futbolçysy Serdar Azmun Aziýanyň iň gymmat futbolçylarynyň bäşligine düşdi. Aziýada bäşinji orna düşen 25-ýaşly futbolçynyň transfer bahasy 18 million ýewro diýlip bahalandyrylýar. Bu sanawy Transfermarkt nemes portaly düzýär.
Bu sanawda birinji orna «Tottenhemiň» koreýaly hüjümçisi Son Hyn Min eýe boldy. Onuň nyrhy 60 million ýewro diýlip hasaplanyldy. Ikinji orny «Realyň» «Willýareýýalda» kärende hukugynda çykyş edýän ýaponiýaly zehinli futbolçysy Takefusa Kubo (30 million ýewro) eýeleýär. 20 million ýewro diýlip bahalanýan «Walensiýanyň» günorta koreýaly ýarym goragçysy Li Kan In üçünji orna düşdi. Dördünji orny bolsa ýaponiýaly Takehiro Tomiýasu eýeledi. «Bolonýada» çykyş edýän bu futbolça 18 million ýewro baha kesilýär.
Aziýanyň iň gymmatbahaly on futbolçysynyň sanawyna Ýaponiýadan 5, Koreýa Respublikasyndan 3 hem-de Eýrandan 2 futbolçy düşdi. Bu häzirki wagtda sebitdäki ýygyndylaryň güýçlerini hem aýdyň görkezýär. AFK-nyň baýdagy astynda çykyş edýän Awstraliýa soňky döwürde özüniň öň hatarlardaky ornuny ýitirdi. Bu ýurduň türgenleriniň hiç haýsysy iň güýçli onluga düşüp bilmedi.
Türkmenistanly futbolçylar babatynda aýdanymyzda bolsa Transfermarkt Gazagystanyň «Şahterynda» çykyş edýän Ruslan Mingazowy hem-de Özbegistanyň AGMK toparynyň ýarym goragçysy Arslanmyrat Amanowy ýurdumyzyň iň gymmatbahaly futbolçylary hökmünde bahalandyrdy. Saýtyň bahasyna görä Mingazow 500 müň ýewro, Amanow bolsa 400 müň ýewro durýar.
Futbolçylara nyrh kesmek işi boýunça ýöriteleşen abraýly nemes internet portalynyň maglumatlaryna görä häzirki wagtda Gazagystanyň çempionatynda çykyş edýän, Türkmenistanyň milli ýygyndysynyň ýarym goragçysy Ruslan Mingazow milli ýygyndymyzyň düzüminde hem iň gymatbahaly oýunçy diýlip hasaplanylýar.
Teswirler