Bu ýyl bu sene dünýäde koronawirus keseliniň öňüni almak barada aýratyn tagallalaryň edilýän döwrüne gabat geldi. Elbetde, adamlaryň saglygynyň her bir ýurduň esasy gymmatlygy bolup durýandygy üçin ynsan saglygyny goramak islendik döwürde-de, şol sanda häzirki günde hem aýratyn uly ähmiýete eýe bolmagynda galýar. Saglygyň iň uly baýlykdygy nazarda tutulyp, dünýäde ençeme baýramçylyklar we belli seneler döredilipdir. Şolaryň biri-de Eliňi ýuwmagyň bütindünýä günüdir. Bu halkara sene Birleşen Milletler Guramasynyň Çagalar gaznasynyň (ÝUNISEF) başlangyjy bilen döredilip, her ýylyň 15-nji oktýabrynda bellenilip geçilýär. Ilkibaşda ol BMG-niň Baş Assambleýasy tarapyndan yglan edilen Sanitariýa ýylyna bagyşlanypdy.
Bu möhüm sene ýuwulmadyk elleriň howply kesellere sebäp bolup biljekdigini ýatladyp durýandygy üçin häzirki günlerde hem uly ähmiýete eýedir. Eliňi sabynlap gowy edip ýuwmak, dürli keselleriň ýaýramagynyň öňüni alýar. Lukmanlaryň berýän maslahatlaryna görä, eliňi nahar iýmezden we taýýarlamazdan ozal, jemgyýetçilik ulagyndan düşeniňden soň, pul elläniňden soň, daşardan öýe geleniňde we haýsydyr bir sebäp bilen eliň hapalananda ýuwmak dürli keselleriň öňüni almaga ýardam edýär.
Jennet Rejepowa,
TOHU-nyň talyby.
Teswirler