Garaşsyz döwletleriň arkalaşygynyň agza döwletleriniň parlamentara mejlisiniň baş edarasy bolan Tawride köşgünde GDA-nyň Goranmak we howpsuzlyk meseleleri boýunça hemişelik komissiýasynyň mejlisi wideo konferensiýa görnüşinde geçirildi.Bu çärä Azerbaýjan Respublikasynyň, Ermenistan Respublikasynyň, Belarus Respublikasynyň, Gazagystan Respublikasynyň, Russiýa Federasiýasynyň, Täjigistan Respublikasynyň, Özbegistan Respublikasynyň parlamentleriniň wekilleri, resminamalary taýýarlaýanlar we bilermenler gatnaşdylar.
Duşuşygyň başynda GDA agza döwletlerden parlament wekilleri Azerbaýjanyň Milli Mejlisiniň başlygynyň orunbasaryAdil Aliýewi GDA-nyň Goranmak we howpsuzlyk meseleleri boýunça hemişelik komissiýasynyň başlygynyň orunbasary wezipesine biragyzdan saýladylar. Soňra komissiýanyň agzalary öz işlerini dowam etdirmeklik bilen “Milli howpsuzlyk hakynda” model kanunynyň taslamasyny ara alyp maslahatlaşdylar. Bu kanunyň taýýarlanmagynyň baş maksady GDA döwletleriniň özygtyýarlylygyny we territorial bitewiligini berkitmek, milli howpsuzlygy üpjün etmek üçin raýat jemgyýetiniň mümkinçiliklerinden peýdalanmak zerurlygy bilen şertlendirildi.
Işlenip düzülen kanun taslamasy milli howpsuzlyk pudagyndaky gatnaşyklary kadalaşdyrýar, adam kukuklarynyň we azatlyklarynyň berk kanuny binýadyny, milli howpsuzlyk ulgamynynyň maksatlaryny we ýörelgelerini, işiniň mazmuny, milli howpsuzlyk edaralarynyň ygtyýarlyklaryny we wezipelerini, şeýle hem milli howpsuzlyk pudagyndaky berk gözegçiligi ýola goýmagyň ýagdaýyny kesgitleýär.
Mejlis agzalary bu resminamalaryň taslamasyny bilermenleriň pikirini almaklyk üçin GDA-nyň agza döwletleriniň parlamentlerine ibermeklik kararyna geldiler.
Duşuşygyň dowamynda komissiýanyň agzalaryna 2021-nji ýylda geçiriljek halkara konferensiýasynyň baş maksatnamasy barada maglumat berildi. Şeýle-de, şu günki mejlisde ara alnyp maslahatlaşylan “Milli howpsuzlyk hakynda” model kanunynyň taslamasynyna laýyklykda GDA ýurtlarynyň arasynda adam hukuklaryna we kanuna öňküsi ýaly hemmetaraplaýyn hormaty üpjün etmek çärelerini geçirmeklik bellenildi.
Toýly Jänädow
Teswirler