Berkarar döwletiň bagtyýarlyk döwründe eziz Watanymyzda bilim, medeniýet, sungat gün-günden ösýär we özgerýär. Hormatly Prezidentimiziň alyp barýan ynsanperwer syýasatynyň netijesinde “Türkmenistan Bitaraplygyň mekany” ýylynda goňşy döwletler bilen dostlukly aragatnaşyklar barha güýçlenýär. Her ýylda Türkmenistanyň Döwlet çeperçilik akademiýasynyň talyplary Russiýa Federasiýasynyň Moskwa şäherine Igor Burganow adyndaky sungat akademiýasyna gidip okuw tejribeliklerini artdyrýarlar. Şol ýerde ýaş heýkeltaraşlar iş usullaryny öwrenip, öz ussatlyklaryny kämilleşdirip, täze döredýän eserlerini has-da döwrebap häsiýetli bolmagyna ymtylýarlar. Moskwa şäherindäki çeperçilik muzeýlerine, sergi zallaryna baryp hem-de tejribelik sapaklaryny geçirip geljekki dörediljek eserlerine, çeper taslamalaryna täze güýçli ylham bilen amala aşyrmaga taýar bolup gelýärler.
Ýakynda Türkmenistanyň Döwlet çeperçilik akademiýasynda Russiýa Federasiýasynyň Moskwa şäherindäki Igor Burganow adyndaky sungat akademiýasy bilen ýokary okuw mekdebimiziň mugallymlarynyň arasynda teleköpri arkaly dostlukly döredijilik duşuşygy geçirildi. Ýurdumyzda sanly bilim ulgamy okuwumyzyň aýrylmaz bir bölegi bolup durýar. Muňa mysal edip, biziň akademiýamyzda sanly bilim ulgamynyň mümkinçiligini biz öz okuw gollanmalarymyzda, kitaplarymyzda we döredijilik suratlarynyň elektron görnüşini islän ýerimizde okuw sapaklarymyzdan daşary taýýarlanmaga mümkinçiligi döredilen. Sanly bilim ulgamynyň çäklerinde gurnalýan dürli temaly teleköpriň üsti bilen okuw tejribelik sapaklaryny talyplar öz ýaşaýan welaýatlarynda, şäherlerinde ýeke bir okaýan okuw jaýy bilen däl-de, eýsem, daşary ýurtlar bilen hem aragatnaşygy saklap bilýärler. Şeýle döredijilik gatnaşyklary dersleri döredijilikli özleşdirmäge, täze bilimleri giňden açyp, şol bir wagtda hem olary peýdalanmaga uly ýardam berýär.
Hormatly Prezidentimiz ýaşlar üçin edýän aladalaryna, döredip beren mümkinçiliklerine sag bolsun aýdyp, öz gezegimizde geljekde Watanyň at abraýyny belende göterjegimizi ynandyrýarys. Gahryman Arkadagymyzyň jany sag, ömri uzak bolsun, il ýurt bähbitli tutýan tutumly işleri elmydama rowaç bolsun!
Amantuwak Aýnazarowa,
Türkmenistanyň Döwlet çeperçilik akademiýasynyň Sungaty öwreniş kafedrasynyň 3-nji ýyl talyby
Teswirler