Ýakynda Türkmenistanyň Senagatçylar we telekeçiler birleşmesiniň «Telekeçiler mekdebi» jemgyýetçilik guramasynyň kärhanasy birbada iki nokatda, ýagny paýtagtymyzda we Mary şäherinde täze hünärleriň ikisi — ýeňil geýimleriň biçimçi-tikinçisi we ofisant hünärleri boýunça okuwlary herekete girizdi. Şol gün «Telekeçiler mekdebinde» ýeňil geýimleriň biçimçi-tikinçisi hünäri boýunça ýola goýlan okuwlaryň başlanmagy mynasybetli çäre geçirildi. Oňa bu okuwlaryň guramaçysy bolup çykyş edýän düzümlerden wekiller — Türkmenistanyň Zähmet we ilaty durmuş taýdan goramak ministrliginiň Zähmet gory we iş üpjünçilik müdirliginiň ýolbaşçysy, ykdysady ylymlaryň kandidaty Maýagözel Babaýewa, BMG-niň Ösüş maksatlary boýunça maslahatçysy Arslan Joraýew, Türkmenistanyň Senagatçylar we telekeçiler partiýasynyň Aşgabat şäher komitetiniň başlygy Dädebaý Näzkulyýew, hünärmenli Soltan Atakişiýewa dagylar gatnaşyp, okuwlaryň şowly bolmagyny, durmuşda örän zerur bolup duran hünäri ele almak isleýän ýaşlara üstünlikleriň hemra bolmagyny arzuw etdiler. Soňra myhmanlar Ýeňil geýimleriň biçimçi-tikinçisi hünäri boýunça sapaklary okadýan mugallymlar Şemşat Çaryýewanyň we Meýlis Orazowyň guran ilkinji açyk sapaklaryna gatnaşdylar.
Teşne ruhlary gandyrýan «Paýhas çeşmesi» kitabymyzda «Hünäri öwrende, ýigren», «Hünär – akar bulak, ylym – ýanar çyrag», «Hünärli – zor, hünärsiz – hor», «Hünär eýesini eziz eder», «Är hünäri bilen eziz» ýaly birnäçe nakyllar bar. Şolardan hem belli bolşy ýaly, ynsanyň bezegi ― eliniň hünäri. Şonuň üçin halkymyz öz çagasyna bir hünäriň başyny tutmagy, şol ugurdan ökde hünärmen bolmagy, kesbinden kemal tapmak üçin yhlasly, tutanýerli bolmagy ýaşlykdan gulagyna guýýar. Oňa müň dürli hünäri öwretse-de az görýär. Eliň hünärli bolup il-günüň derdine ýaramakdan, halkyňa, Watanyňa hyzmat etmekden uly bagt bolsa ýokdur. Bir adama hünär öwredip, ony hünärli edip goýbermek — sogap iş.
Türkmenistanyň Senagatçylar we telekeçiler birleşmesiniň «Telekeçiler mekdebi» jemgyýetçilik guramasynyň kärhanasy hem ýaşlaryň hünärli bolmaklary üçin ajaýyp mümkinçilikleri döredýän özboluşly okuw ojagydyr.
Bu mekdebe Türkmenistanyň Bilim ministrligi tarapyndan 27 ugur boýunça okuwlary açmaga ygtyýarnama berlipdir. Olaryň hatarynda:
- Telekeçiligiň esaslary;
- Ykdysady bilimleriň esaslary;
- Işgär iş dolandyryjylyk we arhiw işi;
- Buhgalter hasabynyň we maliýe hasabatlylygynyň esaslary;
- 1C buhgalter hasaby;
- Maliýe hasabatlylygynyň halkara standartlary — Maliýe hasabaty –I;
- Kompýuter sowatlylygy (I-II-III derejeleri), AwtoCAD we 3D Max programmalarynyň esaslary;
- Himiýa;
- Biologiýa;
- Matematika;
- Fizika;
- Taryh;
- Nemes dili;
- Iňlis dili;
- Rus dili (I-II-III dereje);
- Hytaý dili — Başlangyç dereje, Grammatika;
- Işewür hytaý dili;
- Ofisant hünärine giriş;
- Myhmanhana hojalygynyň serenjamçysy;
- Gid-terjimeçi;
- Ýeňil geýimleriň biçimçi-tikinçisi (I-II-III dereje);
- Bagban-nahal oturdyjy;
- Ösümlikçilik;
- Çörek-bulka önümlerini taýýarlaýjy;
- Aşpez;
Umumy bilim berýän mekdepleriň I-IV synplarynda geçilen materiallary berkitmek boýunça okuw ýaly ugurlar bar. Häzirki wagtda bu ugurlaryň birnäçesi boýunça gysga möhletli okuwlary guramak işi ýola goýuldy. Şeýle hem, okuwlary guramak işleri agzalýan ygtyýarnama laýyklykda, Aşgabat şäheriniň Beýik Saparmyrat Türkmenbaşy şaýolunyň 81-nji jaýynda, Ahal welaýatynyň Kaka şäheriniň S.Türkmenbaşy köçesiniň 2/1 jaýynda, Mary welaýatynyň Mary şäheriniň Bitaraplyk köçesiniň 18-nji jaýynda, Mary welaýatynyň Baýramaly şäheriniň Soltan Sanjar köçesinde ýerleşýän Hyzmatlar öýünde, Lebap welaýatynyň Türkmenabat şäheriniň Alty Garlyýew köçesiniň 2-nji jaýynda, Lebap welaýatynyň Köýtendag etrabynyň Magdanly şäheriniň S.A.Nyýazow şaýolunyň 6-njy jaýynda, Lebap welaýatynyň Kerki şäheriniň S.A.Nyýazow köçesiniň 24-nji jaýynda, Daşoguz welaýatynyň Daşoguz şäheriniň Magtymguly şaýolunyň 5/3-nji jaýynda, Balkan welaýatynyň Balkanabat şäheriniň 160-njy ýaşaýyş jaý toplumynyň 19-njy jaýynda, Balkan welaýatynyň Balkanabat şäheriniň Söýün Orazow köçesiniň 211-nji ýaşaýyş jaý toplumynyň 72-nji jaýynda amala aşyrylýar.
Pursatdan peýdalanyp, ýeri gelende, agzalan hünärler boýunça okamak isleýänleri öz guraýan okuwlarymyza çagyrýaryn. Bize şeýle sogap işleri amala aşyrmaga, ýaşlara bolsa müň dürli hünäriň eýesi bolmaga ajaýyp mümkinçilikleri döredýän Gahryman Arkadagymyza alkyşlarymyz egsilmezdir — diýip, Türkmenistanyň Senagatçylar we telekeçiler birleşmesiniň «Telekeçiler mekdebi» jemgyýetçilik guramasynyň kärhanasynyň direktory Aköýli Orazgylyjow gürrüň berýär.
Biz hem «Telekeçiler mekdebi» JGK-nyň alyp barýan ajaýyp işlerinde üstünlikleriň, öňedigişlikleriň hemra bolmagyny arzuw edýäris.
Wepa Gurbanow,
Türkmenistanyň Senagatçylar we telekeçiler partiýasynyň Aşgabat şäher komitetiniň bölüm müdiri.
Teswirler