Şu ýylyň 24-nji fewraly — 10-njy marty aralygynda paýtagtymyzdaky Olimpiýa şäherçesinde Futzal boýunça Aziýa çempionaty geçiriler. Çempionaty ýokary derejede geçirmek üçin şu günlerden ýokary derejede taýýarlyk işleri alnyp barylýar.
Indi birnäçe ýyl bäri halkara ýaryşlary yzygiderli geçirip gelýän ýurdumyzda her bir ýaryşyň ýokary derejede geçirilmegine ýokary okuw mekdepleriniň talyplaryndan düzülen meýletinçi ýaşlar hem mynasyp goşantlaryny goşýarlar.
Häzirki günlerde Türkmenistanyň Bilim, Sport we ýaşlar syýasaty ministrlikleriniň bilelikde işläp düzen meýilnamasy esasynda ýurdumyzyň ýokary okuw mekdeplerinde bilim alýan talyp ýaşlaryň 350-si Aziýa çempionatyna meýletinçiler hökmünde taýýarlanylýar. Meýletinçiler — olar daşary ýurt dillerini bilýän ýaşlar bolup, çempionatyň geçýän günleri oňa gatnaşyjylara dilmaçlyk ederler. Ýokary okuw mekdeplerinde hereket edýän meýletinçiler merkezinde ýaşlara on bir ugur boýunça bilim berilýär. Sapaklar türkmen hem-de iňlis dillerinde geçirilip, olara ýurdumyzyň taryhy ýadygärlikleri, gözel paýtagtymyzda ýerleşýän ajaýyp binalar baradaky maglumatlar, şeýle-de futzal oýnunyň taryhy öwredilýär.
Meýletinçiler merkezinde alnyp barylýan işler bilen tanyşmagy maksat edinip, Türkmen döwlet binagärlik-gurluşyk institutynda bolanymyzda, bizi institutyň diller kafedrasynyň uly mugallymy, meýletinçiler merkeziniň başlygy Kümüş Allabaýewa garşylady. Kümüş mugallym indi birnäçe ýyl bäri meýletinçileri taýýarlamakda yhlasyny, zehinini gaýgyrman zähmet çekip gelýär.
Biz meýletinçileriň alyp barýan işleri dogrusynda Kümüş mugallym bilen söhbetdeş bolanymyzda, ol şeýle gürrüň berdi:
— Sport arkaly dost-doganlygy, parahatçylygy pugtalandyrmakda, ýurdumyzda bedenterbiýe we sport ulgamyny ösdürmekde uly işleri durmuşa geçirýän Gahryman Arkadagymyzyň parasatly baştutanlygynda eziz Diýarymyzda halkara sport ýaryşlary yzygiderli geçirilýär. «Türkmenistan — Bitaraplygyň mekany» ýylynda–da paýtagtymyzda halkara ýaryşlaryň üçüsi geçiriler. Olaryň ilkinjisi Futzal boýunça Aziýa çempionatydyr. Şu günler nobatdaky halkara ýaryşa ýokary derejede taýýarlyk görýäris.
Aziýa çempionatyna taýýarlanylýan meýletinçilere akkreditasiýa, myhmanlary ýerleşdirmek, işgärler we meýletinçiler, ulag üpjünçiligi, myhmanlary garşy almak we ugratmak, desgany dolandyrmak, lukmançylyk hyzmatlary, dopinge garşy göreş, petek, media we metbugat, protokol, tehnologiýa, iýmit we arassaçylyk ýaly ugurlar boýunça sapak berilýär. Ýurdumyzda geçirilýän halkara ýaryşlar diňe bir türkmen türgenleri üçin däl, eýsem, meýletinçiler üçin hem tejribe mekdebi bolup durýandygyny bellemek gerek. Sebäbi her ýaryşda tejribelerini artdyrýan meýletinçiler täze goşulan ýaş meýletinçiler bilen öz başarnyklaryny, tejribelerini paýlaşýarlar.
Biz — bilim işgärleri bolup, meýletinçiler bilen Futzal boýunça Aziýa çempionatynyň üstünlikli geçmegine mynasyp goşant goşjakdygymyza buýsanýarys.
Hawa, hakykatdan hem meýletinçiler Aziýa çempionatyna ýokary depginde taýýarlyk görýärler. Öz ýokary okuw mekdeplerinde, şeýle hem Olimpiýa şäherçesindäki Başa-baş söweş sungaty sport toplumynda okuw sapaklaryny alyp barýan meýletinçiler ýörite hünärmenleriň gatnaşmagynda öz tejribelerini, bilimlerini artdyrýarlar.
Soňra biz Magtymguly adyndaky Türkmen döwlet uniwersitetine baryp, birnäçe halkara ýaryşlaryna meýletinçi bolup gatnaşan Aýgül Ataýewa bilen söhbedimizi dowam etdirdik:
— Men birnäçe halkara sport ýaryşlaryna meýletinçi bolup gatnaşdym. Häzirki günlerde bolsa professor mugallymlarymyzyň, ýörite hünärmenleriň ýolbaşçylygynda Futzal boýunça geçiriljek Aziýa çempionatyna taýýarlyk görýäris. Biziň ýokary okuw mekdebimizde hereket edýän meýletinçiler merkezinde tejribämizi artdyrmaga ähli şertler bar. Bu ýerdäki sport sözlükleri, ýurdumyzyň muzeýleri, taryhy ýadygärlikler bilen tanyşdyrýan kitaplar, dürli diller boýunça ýörite sözlükler biziň üçin gollanma bolup durýar.
Futzal iň bir gyzykly sport görnüşleriniň biridir. Sportuň bu görnüşi bilen baglanyşykly gepleşiklere tomaşa etmegi gowy görýärin. Aziýa çempionatynda çykyş etjek milli ýygyndymyzyň türgenlerine uly üstünlikleri arzuw edýäris. Biz — ýaşlara okamaga, öwrenmäge döredip berýän mümkinçilikleri üçin Gahryman Arkadagymyza alkyş aýdýarys. Milli Liderimiziň döwletimiziň gülläp ösmegi ugrunda alyp barýan döwletli işleri rowaçlyklara beslensin!
Futzal boýunça Aziýa çempionatynyň ýokary derejede geçmegi üçin mynasyp goşant goşjak ýaşlaryň buýsançly gürrüňlerini diňlemek diýseň ýakymly. Olarda şeýle abraýly halkara sport ýaryşynyň gözel paýtagtymyzda geçirilmegi üçin tagalla eden, türkmen sportunyň şöhratyny dünýä ýaýmak ugrunda abyrsyz işleri alyp barýan hormatly Prezidentimize çäksiz buýsanç bar.
Teswirler