Woleýbol. Aşgabat şäherinde Türkmenistanyň klub toparlarynyň arasynda milli woleýbol çempionaty dowam edýär. Bu çempionata toparlaryň 11-si gatnaşyp, olar iki toparçada özara bäsleşýärler. Ýaryş iki aýlawdan ybarat bolar. Çempionatyň ýeňijisi 2020-nji ýylyň aprel aýynda geçiriljek Aziýanyň klub toparlarynyň arasyndaky bäsleşikde Türkmenistana wekilçilik eder. Türkmenistanyň klub toparlarynyň arasyndaky milli woleýbol çempionat 2019-njy ýylyň 2-nji dekabrynda tamamlanar.
***
Futbol. Çempionatyň tamamlanmagyna 3 tapgyr galanda «Altyn asyr» bassyr 6-njy gezek ýurdumyzyň çempiony boldy. Muňa garamazdan, ýurdumyzyň futbol çempionatynyň XXIII tapgyrynyň wagty süýşürilen duşuşygy, ýagny «Ahal» bilen geçirilen türkmen derbisi gyzgalaňly häsiýete eýe boldy. Paýtagtymyzdaky «Aşgabat» köpugurly stadionynyň türgenleşik meýdançasynda guralan duşuşykda «Ahal» topary «Altyn asyrdan» üstün çykmagy başardy. Bu ýeňiş «Şagadam» bilen «Ahalyň» arasyndaky 2-nji orun ugrundaky göreşi ýitileşdirdi.
***
Tennis. Golaýda Aşgabat şäherinde Türkmenistanyň kubogy ugrundaky tennis ýaryşy tamamlandy. Bu barada Türkmenistanyň tennis federasiýasynda habar berildi. Kubok ýaryşyna Mary, Lebap, Daşoguz welaýatlarynyň we Aşgabat şäheriniň ýygyndy toparlary gatnaşdy. Her welaýata 2007-nji ýyl we ondan uly bolan türgenler wekilçilik etdi. Bäsleşikler erkekleriň we zenanlaryň arasynda geçirildi. Bu ýerde ýekelikde oýnamakda hem-de jübüt bolup oýnamakda tapawutlananlar guramaçylar tarapyndan gymmat bahaly sowgatlar bilen sylaglandy.
***
Welosport. Türkmenistanyň Welosport federasiýasy Türkmenistanyň Sport we ýaşlar syýasaty ministrligi bilen bilelikde paýtagtymyzda welosportuň ýolda sürmek (şosse) görnüşi boýunça ýurdumyzyň welaýatlarynyň we Aşgabat şäheriniň türgenleriniň gatnaşmaklarynda ýaşlaryň arasynda Türkmenistanyň birinjiligini, ulularyň arasynda aýlaw usulyndaky toparlaýyn görnüşde Türkmenistanyň çempionatyny geçirdi. Geçirilen bäsleşiklerde Gadam Köşiliýew, Atajan Hojageldiýew, Kakabaý Ataýew, Mahmut Aşyrow, Aýnur Amangeldiýewa dagy tapawutlanmagy başardy.
Türkmenistanyň Sport we ýaşlar syýasaty ministrliginiň resmi saýtyndaky maglumatlar esasynda taýýarlanyldy.
Teswirler